Елак - аёллар устки кийими.
XIX аср охири - XX аср боши. Ипак, чит мато, жияк Ичан Қалъа музей-қўриқхонаси комплекси фонди. Хива Аёлларнинг устки кийимлари этаги томонига кенгайиб борадиган, ихчам бичимли “мисак”, “елак маросим” кийимлари базм, меҳмонга бориш учун кийилган. Бу кийимлар асосан совуқ об-ҳавода  кийиб юриш учун мўлжалланган бўлиб, астар билан асосий матонинг орасига пахта қўшиб, махсус усулда майда чоклар билан қавиб тикилган. “Мисак” ва “елаклар” асосан қизил ва яшил рангли йўл-йўл ярим ипак “олача” матосидан тикилган, астарига оч яшил рангли пахта  мато ишлатилган. Хоразм либосларини тайёрлашда қўлланилган қавиқ усули Ўзбекистоннинг бошқа ҳудудларида мавжуд бўлган усуллардан тубдан фарқ қилиб келган. Бу усулда мато йўлларининг оралиғи 0,5–1 смда жуда майда ва бежирим тарзда тикилган. Устки кийимларнинг ён, этак ва енгларининг ички тарафи ярим ипак матодан кўндаланг қилиб бичилган, адип ёки қизил рангли ипакдан тўқилган “фаровуз” жияклар билан ҳошияланган. Ён тараф қирқимида эса жиякларнинг чети қизил, сариқ, оқ рангли иплар билан чоклаб тикилган. Бундай жияклар устки кийимнинг чўнтакларининг чокларини безатишда ҳам кенг қўлланилган.