Хоразм воҳасидаги эркакларнинг қадим кийиниш аъаналарниинг кўпчилиги бугунги кунгача етиб келган. Эркаклар тарихий кийимлари таркибига ички “елка”, “белкийим”, “яктак”, “иштон-чалвар”, “чолбир”. Устки кийимлар: “дўн”, “астардеш” , “чакмон”, чарм ва мўйнадан тикилган “пўстин”, бош кийимлардан “таҳя”, “чўгирма”, безаклар: “белбоғ”, “турма”, “мадали белбоғ” , пойабзаллар: чарм адик (этик) кирган. Эркаклар устки кийимининг турлари кўп бўлган: “дўн” , “чопон”, “астардеш – елвагай”, “чакмон” , “пўстин”, “камзул”, “авра тўн”ларнинг барчаси узун, олди очиқ, ёқа ўмизи уч бурчак ёки айлана, енглари тор бичимли, узун, иқлимнинг иссиқ кунларига енги калта устки кийимлар кийиш одат бўлган. Енгил елка кийими асосан ичкийим сифатида фойдаланилган. Ичкийимлар кўпинча пахтадан тўқилган, оқ рангли маҳаллий матолардан тикилган. Уларнинг ўзи ҳам, енглари ҳам узун, горизонтал ёқа ўмиз бичимли бўлган. Шунингдек, “жубба”, “курта”, “яхтак”, иссик кунларда эса “ялангқат” деган енгил ички кийим, “жубба” ва “курта”ларнинг пахта қўшиб қавилган қалинлаштирилган вариантлари ҳаво совуқ мавсумларда кийилган. Устки кийимларнинг узунлиги, безатилишига қараб, унинг эгаси қайси ижтимоий табақага мансублиги, жамиятда тутган ўрни ҳақида маълумот берилган. Юқори табақага мансуб кишилар ва амалдорларнинг устки кийимлари узунлиги бўйи баробар, юқори сифатли шойи кимхоб (парча), банорас, бахмал матолардан, айрим ҳолларда ёқа ўмизидан этагигача мўйна қўшиб тикилган. Хивадаги Ичан-Қалъа Давлат ўлкашунослик музейида Муҳаммад Раҳимхон II Ферузга тегишли бўлган бахмал чопон ва тулки мўйнасидан тикилган почапўстин Хоразм хонлиги даври эркаклар устки кийимлари намуналари ҳисобланади. Қуйи табақа вакилларининг устки кийимлари маҳаллий косиблар томонидан тўқилган бўз, пахта матолардан тикилган бўлиб, одми, безаги кам ёки умуман безаксиз бўлган. Ёқа ўмизи тикилиш технологияси ва бичими жиҳатидан Сўғд ва Бақтрияликларнинг кийимларини ёқаларига ўхшашлиги бўлган.

Қўзиева Малика Хонликлар даври ўзбек миллий либоси тарихи